काठमाडौंमा ऊर्जा प्रणाली प्रविधिसम्बन्धी अन्तर्राष्ट्रिय सम्मेलन सुरु, १५ देशका ऊर्जा विशेषज्ञ सहभागी

विश्वभरका इलेक्ट्रिकल तथा इलेक्ट्रोनिक इन्जिनियरहरुको संस्था आई-ट्रिपल ईको पावर एन्ड इनर्जी सोसाइटी (पीईएस)को आयोजनामा ऊर्जा प्रणाली प्रविधिसम्बन्धी अन्तर्राष्ट्रिय सम्मेलन सोमबारदेखि काठमाडौंमा सुरु भएको छ ।

पीईएसको नेपाल च्याप्टरको सहआयोजनामा भएको यो सम्मेलनमा १५ देशका करिब १०० प्रतिनिधि सहभागी रहेको सम्मेलनको प्राविधिक समितिका कोचेयर डा. सुजन अधिकारीले जानकारी दिनुभयो। पावरकन नामले चिनिने यो सम्मेलन ऊर्जा प्रणालीसम्बन्धी विश्वकै ठूलोमध्येको कार्यक्रम मानिन्छ ।

अनलाइनखबरका अनुसार तीन दिनसम्म चल्ने सम्मेलनमा उर्जा प्रणालीसम्मबन्धी ७७ वटा पेपरहरु प्रस्तुत हुने आयोजकले जनाएको छ ।

कार्यक्रममा सम्बोधन गर्दै आई ट्रिपल ई- पावर एन्ड इनर्जी सोसाइटीकी पूर्वअध्यक्ष जेसिका बियानले यो सम्मेलनले उर्जा क्षेत्रमा अहिले भइरहेका र भोलि हुने परिवर्ननले भविष्यको पुस्तालाई कसरी लाभान्वित बनाउन सकिन्छ भन्ने विषयलाई दिशा निर्देश गर्ने बताउनुयभयो। यो संसारभरिका इलेक्ट्रिकल इन्जिनियरहरूलाई जोड्ने महत्वपूर्ण कार्यक्रम भएको उहाँले बताउनुभयो।

अष्ट्रेलियन इनर्जी मार्केट अपरेटरका रणनीतिक सल्लाहकार डिन सर्राफीले अहिलेको विश्व उर्जा संक्रमणको चौबाटोमा रहेको बताउनुभयो। ‘आधुनिक ऊर्जा प्रणालीले नवीकरणीय उर्जालाई उच्चस्तरमा निरन्तर रुपमा एकीकृत गर्दै लगेको छ र यो विकासका कारण विभिन्न चुनौतीहरु पनि सामना गरिरहेको छ, ‘ उहाँले भन्नुभयो, ‘हामी केन्द्रीकृत उर्जा स्रोतबाट उपभोक्ता उर्जा स्रोततर्फ अघि बढेका छौँ ।’

यस्ता परिवर्तनबारे जान्न र भोलिको भविष्यमा के गर्ने भन्नेबारे छलफल गर्न यो सम्मेलन महत्त्वपूर्ण हुने उहाँले बताउनुभयो।

आईट्रिपलई-पीईएसका भाइस प्रेसिडेन्ट निर्मल नायरले उर्जा क्षेत्रका चुनौतीपूर्ण विषयहरुमा विद्यार्थीहरुलाई पारंगत बनाउन आईट्रिपले इन्जिनियरहरुलाई छात्रवृत्ति दिइरहेको जानकारी दिनुभयो।

ऊर्जा मन्त्रालयका पूर्वसचिव दिनेशकुमार घिमिरेले विश्वासिलो र गुणस्तरीय उर्जा अहिलेको आवश्यकता रहेको बताउनुभयो । ‘नेपालको उर्ज खपतमा ६१ हिस्सा बायोमास (दाउरा गुइँठा आदि)को छ । १० प्रतिशत नवीकरणीय उर्जाको छ र यो बढ्दो क्रममा छ’, उहाँले भन्नुभयो, ‘भविष्यमा दिगो उर्जा प्रणालीको विकास सबैका लागि महत्वपूर्ण हुनेछ ।’

कार्यक्रममा आईट्रिपलईको पावर एन्ड इनर्जी सोसाइटी (पीईएस) नेपाल च्याप्टरका अध्यक्ष प्रा. नवराज कार्कीले यति महत्वपूर्ण सम्मेलन काठमाडौँमा गर्न पाउनु नेपालका लागि गौरवको कुरा रहेको बताउनुभयो।

चाइनिज सोसाइटी अफ इलेक्ट्रिकल इन्जिनियरिङ र आई ट्रिपल ई पावर एन्ड इनर्जी सोसाइटीको पहलमा सन् १९९८ देखि भइरहेको सम्मेलन मूलतः एसिया प्यासिफिक मुलुकहरुमा आयोजना हुने गरेको छ । अहिले काठमाडौंमा यसको १६औँ संस्करण भइरहेको हो ।