काठमाडौँमा नेपाल–चीन कूटनीतिक परामर्श संयन्त्रको १६औँ बैठक सुरु
नेपाल–चीन कूटनीतिक परामर्श संयन्त्रको १६औँ बैठक जुन २५ तारिख मङ्गलबार काठमाडौँमा सुरु भएको छ। बैठकमा नेपाल र चीनबीचको द्विपक्षीय सम्बन्ध र सहयोगका समग्र क्षेत्रबारे छलफल हुने परराष्ट्र मन्त्रालयका प्रवक्ता अमृतबहादुर राईले जानकारी दिनु भएको नेपाल खबर अनलाइनले लेखेको छ।
बैठकमा शिक्षा, स्वास्थ्य पूर्वाधार, कृषि, आर्थिक सहयोग, व्यापार, लगानी, पर्यटन, सम्पर्क सञ्जाललगायत क्षेत्रमा सहयोग आदानप्रदानबारे छलफल हुँदैछ। बैठकका सहभागी हुन जनवादी गणतन्त्र चीनका उपविदेशमन्त्री सुन वेइतोङ नेपालको तीन दिने औपचारिक भ्रमणका लागि जुन २४ तारिख आइतबार बिहान आइपुग्नु भएको छ।
परामर्श संयन्त्रको बैठकमा नेपालका तर्फबाट परराष्ट्रसचिव सेवा लम्सालले प्रतिनिधिमण्डलको नेतृत्व गर्दै हुनुहुन्छ भने प्रतिनिधिमण्डलमा विभिन्न मन्त्रालयका वरिष्ठ अधिकारीहरू सम्मिलित हुनेछन्।
चिनियाँ प्रतिनिधिमण्डलको नेतृत्व उपविदेशमन्त्री सुनले गर्दै हुनुहुन्छ।
भ्रमणका क्रममा चिनियाँ उपविदेशमन्त्री सुनले राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’सँग छुट्टाछुट्टै शिष्टाचार भेटवार्तासमेत गर्ने कार्यक्रम पनि तय भएको छ।
उपविदेशमन्त्री सुन भ्रमण सम्पन्न गरी जुन २६ तारिख बुधबार काठमाडौँबाट प्रस्थान गर्ने तालिका छ।