जलवायुअनुकूल पूर्वाधार निर्माणमा जोड

एसियाली तथा पश्चिम प्रशान्त क्षेत्रका १८ मुलुकका निर्माण व्यवसायीको छाता संस्था इफाप्का सम्मेलन १४ बुँदे काठमाडौं घोषणापत्र जारी गर्दै शुक्रबार सकिएको छ ।

जलवायुअनुकूल पूर्वाधार निर्माण, कार्बन उत्सर्जनमा कटौती, परियोजनाको तयारीमा उपयुक्त अन्तर्राष्ट्रिय अभ्यास गर्नुपर्ने घोषणापत्रमा जोड दिइएको छ । दिगो पूर्वाधारले आर्थिक विकासमा महत्त्वपूर्ण भूमिका खेल्ने भए तापनि बढ्दो जनसंख्या, सहरीकरण, जलवायु परिवर्तनलगायत कारण दिगो पूर्वाधारको उद्देश्यमा चुनौती थपिएकाले तत्काल आवश्यक कदम चाल्नुपर्ने घोषणापत्रमा उल्लेख छ ।

प्राकृतिक विपत्तिसँग जुध्ने संरचना निर्माण अहिलेको आवश्यकता रहेको भन्दै भौतिक पूर्वाधार निर्माणमा समग्र परियोजना चक्रलाई नै ध्यान दिनुपर्नेमा घोषणापत्रले जोड दिएको छ । सहरी पूर्वाधारसहित ऊर्जा, यातायातलगायत क्षेत्रमा उच्च प्राथमिकता दिनुपर्ने बुँदा घोषणापत्रमा समेटिएको छ । इफाप्का आबद्ध सदस्य राष्ट्रबीच अझ बलियो साझेदारी कायम गर्नुपर्ने विषय पनि घोषणापत्रमा राखिएको छ । ‘दिगो पूर्वाधारमा साझेदारी’ नारासहित मंसिर ५ बाट सुरु भएको सम्मेलनमा ४ सय ५० भन्दा बढीको सहभागिता थियो ।

सम्मेलनमा २ सय ४२ जना विदेशी प्रतिनिधि सहभागी थिए । नेपालले यसअघि सन् १९९९ मा ३० औं इफाप्का सम्मेलन आयोजना गरेको थियो । आगामी सम्मेलन भने सिंगापुरमा हुने नेपाल निर्माण व्यवसायी महासंघका अध्यक्ष रवि सिंहले जनाउनुभयो। इफाप्काका अध्यक्षसमेत रहेका सिंहले शुक्रबार आफ्नो जिम्मेवारी सिंगापुरका केनेथ लुलाई हस्तान्तरण गर्नुभयो।