गोरखा संग्रहालय घुम्न आउने पर्यटकको संख्या बढ्दै
गोरखा सदरमुकामस्थित संग्रहालयमा नेपालको इतिहास बुझ्न र हेर्न आउने पर्यटकको संख्या बर्सेनि बढ्दै गएको छ। नेपालको शाहवंशीय राजा र नेपाल एकीकरणको समयमा प्रयोग भएका विभिन्न सामग्री हेर्न आउनेको संख्या बढ्दै गएको गोरखा दरबार संग्रहालय गोरखाले जनाएको नयाँ पत्रिका अनलाइनले लेखेको छ।
आर्थिक वर्ष २०७८/७९ मा ७६ हजारभन्दा बढीले संग्रहालयको अवलोकन गरेको यस संग्रहालयका प्रमुख नवराज अधिकारीले जानकारी दिनुभयो। उहाँका अनुसार भदौमा ६ सय ९९ जना, असोजमा तीन हजार सातजना, कात्तिकमा सात हजार आठ सय ९१ जना, मंसिरमा १४ हजार नौ सय ५२ जना र पुसमा ११ हजार पाँच सय ७३ जनाले संग्रहालय अवलोकन गरेका थिए।
यसैगरी, माघमा तीन हजार नौ सय ९४ जना, फागुनमा ६ हजार चार सय ३३ जना, चैतमा आठ हजार ६ सय ३१ जना, वैशाखमा आठ हजार एक सय तीन जना, जेठमा ६ हजार आठ सय तीनजना र असारमा चार हजार दुई सय ४२ जनाले संग्रहालयको अवलोकन गरेको संग्रहालय प्रमुख अधिकारीले जानकारी दिनुभयो।
जसमध्ये देशभरका विभिन्न विद्यालयबाट आएका २६ हजार एक सय ५२ जना विद्यार्थीले संग्रहालय अवलोकन गरेका थिए। उनीहरूबाट दुई लाख ६१ हजार पाँच सय २० रुपैयाँ राजस्व संकलन भएको छ।
४९ हजार आठ सयजना नेपालीबाट १२ लाख ४५ हजार राजस्व संकलन भएको संग्रहालयले जनाएको छ। त्यस्तै, सार्क राष्ट्रका ५९ जनाबाट दुई हजार नौ सय ५० रुपैयाँ र तीन सय १७ जना विदेशी नागरिकबाट ३१ हजार सात सय रुपैयाँ राजस्व संकलन भएको संग्रहालय प्रमुख अधिकारीले जानकारी दिनुभयो।
त्यस्तै, संग्रहालयभित्र भिडियो क्यामेरा प्रयोग गरी भिडियो र फोटो खिचेबापत १३ जना नेपालीले दुई सयका दरले २६ हजार, सार्क राष्ट्रका २४ जनाबाट दुई सयका दरले ४८ हजार र संग्रहालय परिसरभित्र विभिन्न म्युजिक भिडियो र फिल्म छायांकन गरेबापत एक हजार रुपैयाँका दरले पाँचजनाबाट पाँच हजार रुपैयाँ राजस्व संकलन भएको छ। संग्रहालयवरिपरि पसलहरू भाडामा दिएबापत एक लाख ६ हजार पाँच सय रुपैयाँ संकलन भएको छ। कुल १६ लाख ६८ हजार पाँच सय ७० रुपैयाँ राजस्व संकलन भएको उहाँले जानकारी दिनुभयो।