अन्तर्राष्ट्रिय सङ्ग्रहालय संघद्वारा चिनियाँ सङ्ग्रहालय क्षेत्रसँगको दीर्घकालीन अवधिसम्मको सफल सहयोगको उच्च मूल्याङ्कन

मे १८ तारिख अन्तर्राष्ट्रिय सङ्ग्रहालय दिवस हो। यस अवसरमा चीनमा आयोजित कार्यक्रमलाई अन्तर्राष्ट्रिय सङ्ग्रहालय संघका अध्यक्ष एलबर्टो गार्लान्दिनीले भिडियोमार्फत बधाई व्यक्त गर्नुभएको छ। उहाँले अन्तर्राष्ट्रिय सङ्ग्रहालय संघ र चिनियाँ सङ्ग्रहालय क्षेत्र बीचको दीर्घकालीन अवधिसम्मको सफल सहयोगको उच्च मूल्याङ्कन गर्नुका साथै विश्वका सङ्ग्रहालयहरुले सँगै मिलेर कोरोना महामारीबाट ल्याइएको प्रभावको सामना गर्न आह्वान पनि गर्नुभएको छ।

चालू वर्षको अन्तर्राष्ट्रिय सङ्ग्रहालय दिवसको मुख्य विषय “सङ्ग्रहालयको भविष्य: पुन:स्थापना” रहेको छ। अन्तर्राष्ट्रिय सङ्ग्रहालय संघका अध्यक्ष एलबर्टो गार्लान्दिनीले चीनमा आयोजना गरिएको एक कार्यक्रमलाई भिडियोमार्फत बधाई दिँदै कोरोना महामारीको प्रभावको सामू विश्वका सङ्ग्रहालयहरुले हातमा हात मिलाएर विभिन्न मुलुकका जनता र विभिन्न संस्कृतिबीच पूल बनेर संस्कृतिको विविधताको विकासलाई अघि बढाउनुपर्ने विचार व्यक्त गर्नुभएको छ।

सङ्ग्रहालय विभिन्न मुलुकका जनता र विभिन्न संस्कृति बीचको पूल हो। कोरोना महामारी अहिले विश्वका धेरै मुलुकमा फैलिँदै छ, विश्वका सङ्ग्रहालयहरुले आधुनिक कालमा सबैभन्दा गम्भिर संकटको अनुभव गरिरहेका छन्। हामीले आविष्कार भावनालाई निरन्तरता दिनुका साथै डिजिटल र प्रदर्शनीका नयाँ नयाँ परीक्षण र सुधार गर्नुपर्छ। अन्तर्राष्ट्रिय सङ्ग्रहालय संघले विश्वका सङ्ग्रहालयहरुलाई यस्तो परिवर्तनलाई आह्वान गरेको छ।

अन्तर्राष्ट्रिय सङ्ग्रहालय संघका अध्यक्ष एलबर्टो गार्लान्दिनीले अन्तर्राष्ट्रिय सङ्ग्रहालय संघले चीनको सङ्ग्रहालय क्षेत्रसँग विगत केही वर्षदेखि प्रभावकारी सहयोग गरी विश्वका सङ्ग्रहालय बीचको सांस्कृतिक आदान-प्रदानका लागि नमूना बनाएको पनि जानकारी दिनुभएको छ।

अन्तर्राष्ट्रिय सङ्ग्रहालय संघीय तालिम केन्द्र अन्तर्राष्ट्रिय सङ्ग्रहालय संघ र निषिद्ध दरबार बीचको उत्कृष्ट सहयोगात्मक परियोजना हो, जसले तालिम परियोजनामार्फत सङ्ग्रहालय बीचको आदान-प्रदानलाई अघि बढाएर एसिया प्रशान्त क्षेत्र र नवोदित मुलुकहरुका पूरातात्विक वस्तु र सङ्ग्रहालय सम्बन्धी योग्य व्यक्तिहरुलाई तालिम दिन्छ। सन् २०२१ को जनवरीमा अन्तर्राष्ट्रिय सङ्ग्रहालय संघले शाङहाई विश्वविद्यालयसँग अन्तर्राष्ट्रिय सङ्ग्रहालय संघीय अध्ययन र आदान-प्रदान केन्द्रको स्थापना विषयमा एउटा प्रारुप सन्धिमा हस्ताक्षर गरेको थियो, यस केन्द्र विश्वको एउटा बौद्धिक समूह बन्दै छ र यसले अन्तर्राष्ट्रिय सङ्ग्रहालय क्षेत्रमा देखा परेका विचार र व्यवहार सम्बन्धी महत्वपूर्ण समस्याहरुको समाधान गरिरहेको छ।

विगत केही वर्षदेखि चीनको सङ्ग्रहालय क्षेत्रमा फड्को मार्ने उपलब्धि हासिल भएको छ। चीन राष्ट्रिय पूरातात्विक वस्तु व्यूरोका प्रमुख ली छ्युनका अनुसार, तेह्रौं पञ्च वर्षीय योजनादेखि चीनमा औसत रुपमा हरेक दुई दिनमा एउटा नयाँ सङ्ग्रहालय थपिएको छ। सन् २०२० को अन्त्यसम्म चीनमा कूल ५ हजार ७ सय ८८ सङ्ग्रहालयहरू सञ्चालित छन्। हाल, चीनमा आधुनिक प्रणालीको स्थापना गरी विविध किसिमको सङ्ग्रहालय सञ्चालन भइरहेका छन्। कोरोना महामारी सामू चीनका सङ्ग्रहालयहरुले “क्लाउडबाट प्रदर्शनी” र डिजिटल लगायत नयाँ तरिकामार्फत सङ्ग्रहालय र सर्वसाधारण बीचको दूरी घटाएका छन्।

सन् २०२० मा विश्वका सङ्ग्रहालयहरुलाई महामारीबाट व्यापक रुपमा प्रभावित गरिएको पृष्ठभूमिमा चीनका सङ्ग्रहालयहरुले २९ हजार भन्दा बढी प्रदर्शनीको आयोजना गरी ५४ करोड दर्शकहरुको स्वागत सत्कार गरेको थियो। यसका साथै क्लाउडबाट प्रदर्शनी र क्लाउडबाट प्रत्यक्ष प्रसारण लगायत तरिकामार्फत करोडौं दर्शकहरुले घरमा बसेर अनलाइनमा सङ्ग्रहालयको रोचक प्रदर्शनीको अवलोकन गर्न पाएका छन्।