उच्च प्रविधिबाट वु ख सुङ खेलकुद केन्द्रमा बास्केटबल र आइस हकी मैदान छोटो समयमा परिवर्तन #हिउँदेओलम्पिक

“पैचिङमा भेटौँला” शीर्षकमा हिउँदे ओलम्पिक खेलको परीक्षण कार्यक्रम हाल चलिरहेको छ। यस पटकको परीक्षण कार्यक्रमको अवधिमा पैचिङ २००८ ओलम्पिक खेलकुदको बास्केटबल प्रतियोगिताको आयोजक स्थल, चीनको बास्केटबलको “राष्ट्रिय आयोजक स्थल” मानिने वु ख सुङ खेलकुद केन्द्र ओलम्पिक खेलकुदको रंगशालाको रुपमा सर्वसाधारणका लागि फेरि खुला भएको छ। तथापि यस पटक वु ख सुङ खेलकुद केन्द्र बरफ खेलका लागि प्रतियोगिता स्थल बनेको छ। सन् २०२२ को पैचिङ हिउँदे ओलम्पिक खेलकुद र हिउँदे प्यारा ओलम्पिक खेलकुदको अवधिमा वु ख सुङ खेलकुद केन्द्रमा महिला आइस हकी प्रतियोगिता र केही पुरुष आइस हकी प्रतियोगिताको आयोजना गरिने छ।

सन् २०२२ पैचिङ हिउँदे ओलम्पिक खेलकुद र हिउँदे प्यारा ओलम्पिक खेलकुदको माग पूरा गर्न वु ख सुङ खेलकुद केन्द्रलाई आठ महिनासम्म मर्मत गरिएको छ। मर्मत गरिएपछि रंगशालामा दुई प्रकारका बरफ मैदान रहेका छन्। त्यो आइस हकी, शर्ट ट्रयाक स्पिड स्केटिङ र फिगर स्केटिङका लागि उपयोगी रंगशाला हुनुका साथै ६ घण्टाभित्र “बास्केटबल र आइस हकी मैदान” बीचको परिवर्तन हुनसकेको छ, जुन वास्तविक “ग्रीष्मकालीन ओलम्पिक खेलकुद र हिउँदे ओलम्पिक खेलकुदका लागि सुहाउँदो रंगशाला” हो।

यस पटकको परीक्षण कार्यक्रममा रंगशालाको संचालन टोलीले बरफको प्रत्याभूति, रंगशालाको संचालन र प्रतियोगिताको प्रक्रियामाथि परीक्षण गरेको छ। पैचिङ हिउँदे ओलम्पिक खेलकुद संयोजन समितिको आइस हकी र प्यारा ओलम्पिक खेलकुदको आइस हकी खेल टोलीकी प्रमुख त्वान च्य्वी फाङले यसबारे जानकारी दिँदै भन्नुहुन्छ,

प्रतियोगिताका लागि हामीले उच्च स्तरीय आइस हकी प्रतियोगिताको प्रक्रिया बमोजिम काउन्टडाउनको परीक्षण गरेका छौं। आइस हकी प्रतियोगिताअघि ९० मिनेटदेखि प्रतियोगिताको आयोजना हुँदा हामीले काउन्टडाउनको परीक्षण गरेका छौँ। हामीले हरेक सेन्केन्डका लागि समय तालिकाको तर्जुमा गरेका छौँ र त्यस बमोजिम धेरै पटक पूर्व अभ्यास गरेका छौँ, जसबाट पूर्व निर्धारित समयमा प्रतियोगिताको थालना गर्नसकियोस्।

पैचिङको एउटा माध्यमिक विद्यालयका विद्यार्थी क्वान सु लुन पैचिङ युवा आइस हकी टोलीका एक जना सदस्यको रुपमा परीक्षण कार्यक्रममा भाग लिनु भएको छ। उहाँ यहाँ सर्वोच्च स्तर रहेको बरफ रहेको बताउँदै आफ्नो लक्ष्य राष्ट्रिय आइस हकी टोलीमा प्रवेश गर्ने विचार व्यक्त गर्नुहुन्छ।

यहाँको बरफमा खेल्दा मलाई निकै आनन्द लागेको छ। पहिले यस्तो ठूलो रंगशालामा प्रतियोगितामा भाग लिएको थिएन। पैचिङले हिउँदे ओलम्पिक खेलकुदको आयोजना गर्ने अधिकार प्राप्त गरेपछि आइस हकी खेल्ने किशोर-किशोरी बढ्दै आएकोमा मलाई धेरै खुसी लागेको छ। किनभने चीनको आइस हकीको विकास भविश्यमा राम्रो हुनेछ। मेरो लक्ष्य राष्ट्रिय आइस हकी टोलीमा प्रवेश गर्ने हो र त्यसका लागि मैले अथक प्रयास गरिरहेको छु।

परीक्षण प्रतियोगिताको अवधिमा रंगशालामा सेवा दिने कर्मचारीहरुको संख्या १ हजार पुगेको छ। “काखीमा टाँस्ने हेण्डीप्लास्ट” भन्ने उच्च प्रविधियुक्त उपकरण भएपछि रंगशालामा भएका कर्मचारीहरुको शारीरीक तापक्रमको अनुगमन गर्न पाइन्छ। वु ख सुङ खेलकुद केन्द्रको चिकित्सा सेवाकी उप-प्रमुख यीन चिन सु हेण्डीप्लास्टको आकार जस्तै यो थर्ममिटर अहिले विश्वमा सबैभन्दा सानो थर्ममिटर रहेको जानकारी दिँदै भन्नुहुन्छ,

महामारीको प्रतिरोध कार्य निकै महत्वपूर्ण काम हो। यस उपकरणको विशेषता धेरै सानो भएतापनि उचित रुपमा शारीरीक तापक्रम नाप्नु हो। मान्छेलाई ज्वरो आयो भने त्यसले स्वचालित रुपमा बज्ने छ।