नेपाली भाषा
तपाईँको वर्तमानस्थान:नेपाली भाषा > समाचारहरु > नेपालका समाचार > विस्तृत विषय

राष्ट्राध्यक्ष सीको भ्रमणले द्विपक्षीय सम्बन्ध नयाँ उचाइमा: उपप्रधानमन्त्री पोखरेल

2019-10-15 15:41:32

    नेपालका उपप्रधानमन्त्री तथा रक्षामन्त्री ईश्वर पोखरेलले चिनियाँ राष्ट्राध्यक्ष सी चिनफिङको नेपाल भ्रमणले दुई देशबीचको सम्बन्ध नयाँ उचाइमा पुगेको बताउनुभएको छ। 'सिल्क रोड युथ फोरम'ले आयोजना गरेको 'चाइना-नेपाल युथ कोअपरेशन कन्फरेन्स'को उद्घाटन कार्यक्रममा उहाँले राष्ट्राध्यक्ष सीको भ्रमणले नेपालीमा नयाँ आशा र उत्साह थपेको बताउनुभएको हो। 

भ्रमण द्विपक्षीय सम्बन्धलाई नयाँ उचाइमा पुर्‌याउन ऐतिहासिक रुपमा सफल भएको उल्लेख गर्दै उपप्रधानमन्त्री पोखरेलले चीनको सहयोगले नेपाललाई भूपरिवेष्टित मुलुकबाट भूजडित मुलुक बनाउन योगदान पुग्ने विश्वास व्यक्त गर्नुभएको गोरखापत्र अनलाइनले लेखेको छ। उहाँले भन्नुभयो, “नेपाल र चीन दुवै देश पुराना मित्र हुन्। हाम्रो मित्रतामा कहिल्यै आँच आएन, बरु सहयोगी सम्बन्ध रहिरह्यो। दुवै देशबीच जनस्तरमा पनि बलियो सम्बन्ध रहिआएको छ।” नेपालले चीनको विकास र समृद्धिबाट सिक्न चाहेको उहाँले बताउनुभयो।

    कार्यक्रममा चीनका लागि नेपाली राजदूत लीलामणि पौड्यालले नेपाल अहिले विश्वमै धेरै युवा जनसङ्ख्या भएको मुलुकमध्ये एक रहेको उल्लेख गर्दै दुवै देशका युवाबीच रोजगारी सिर्जना र व्यावसायिक योजनामार्फत दुवै देशले लाभ लिनसक्ने धारणा व्यक्त गर्नुभयो। साथै उहाँले राष्ट्राध्यक्ष सीको नेपाल भ्रमण उपलब्धिमूलक र ऐतिहासिक रुपमा सफल भएको बताउनुभयो।

    फोरमका उपाध्यक्ष तथा महासचिव यङ दोङपिङले नेपाल र चीनबीचको सम्बन्ध माथि प्रकाश पार्दै दुवै देशको आर्थिक विकास र समृद्धिका लागि द्विपक्षीय सहकार्यमा जोड दिनुभयो। कार्यक्रममा नेपाल कम्युनिष्ट पार्टी (नेकपा)को प्रचार तथा प्रकाशन केन्द्रीय विभागका उपप्रमुख सूर्यबहादुर थापाले 'नेपाल-चीन सम्बन्ध, नयाँ युगमा बहुआयामिक साझेदारी' सम्बन्धी प्रस्तुति गर्नुभएको थियो। कार्यक्रममा नेपाल र चीनका युवा विज्ञले विभिन्न विषयका १० प्रस्तुति दिनुभएको थियो।

पात्रो

हामीलाई साथ दिनुहोस्

समाचारहरु:
सबैभन्दा पछिल्लो सूचना नेपालका समाचार अन्य समाचार
फोटो ग्यालरी:
दृष्यावली अनुहार सँस्कृति आदान-प्रदान